Օրեր առաջ Պեկինի ցուցահանդեսում չինական Beijing Auto ընկերությունը ներկայացրեց իր նոր BAIC BJ80 ամենագնացը, որի դիզայնը վերցված է տարբեր հանրահայտ ավտոմեքենաներից: Մեքենան կողքից հիշեցնում է Mercedes-Benz G դասի ամենագնացը, առջևի լուսարձակները` Land Rover Discovery-ն, իսկ ռադիատորային ճաղավանդակը նման է Hummer-ի և Jeep-ի ճաղավանդակներին:

Ըստ ավտոարտադրողի, նորեկը կառուցված է ռազմական 80 VJ ամենագնացի հիմքի վրա: Նշենք, որ Beijing Auto ընկերությունը 2012 թվականին համաձայնագիր է կնքել Daimler կոնցեռնի հետ, ըստ որի, նա իրավունք է ստացել օգտագործելու Mercedes-Benz G դասի դիզայնը: Ըստ էության, ավտոմեքենան B80V ռազմական մեքենայի քաղաքացիական տարբերակն է, որն ունի սարքավորումների հարուստ բազա և թանկարժեք սրահ: Ամենագնացի ճանապարհը  կլուսավորեն լուսադիոդային լուսարձակները: G-wagen-ի կլոնը ունի 21 դյույմանոց անվասկավառակներ և ավտոմատ փոխանցման տուփ: Ինչ վերաբերվում է մեքենայի ագրեգատին, այն ունի և 2,4 լիտրանոց և 4 լիտրանոց V8 շարժիչ՝ կախված մեքենայի մոդիֆիկացիայից: Ըստ տեղեկությունների Beijing Auto BJ80-ի լավագույն մոդիֆիկացիան կարժենա 27.000 դոլլար: